මොහොමඩ් සිරාජ්ගේ විශිෂ්ට පන්දු යැවීමත් ශ්‍රී ලංකා පිතිකරුවන්ගේ දියාරු පිතිහරඹයත් හේතුවෙන් 16 වැනි වරට පැවැති ආසියානු කුසලාන ක්‍රිකට් තරගාවලියේ ශුරතාවය තමන් සතුකර ගැනීමට ඉන්දියාව අද ( 17 ) සමත් විය. මෙම ජයග්‍රහණයත් සමගින් ඉන්දියාව ආසියානු කුසලානය ජයගත් 8 වැනි අවස්ථාව බවට පත්විය.

කොළඹ ආර් ප්‍රේමදාස ක්‍රීඩාංගණයේ පැවැති මෙම තරගය විනාඩි 116ක් ( පැය 2 අඩුවෙන් )  වැනි කාලයක් තුළදී අවසන් වීම කාගේත් කතා බහට ලක්වන මාතෘකාවක් බවට පත්වූයේ  ශ්‍රී ලංකා කණ්ඩායම ලැබූ මෙම අවමන් සහගත පරාජය නිසාවෙනි.

කාසියේ වාසිය ජයග්‍රහණය කළ ශ්‍රී ලංකා නායක දසුන් ශානක පළමුවෙන් පන්දුවට පහර දීමට තීරණය කළේය. ඒ අනුව තරගය ප.ව 3.00 ට ආරම්භ වීමට නියමිතව තිබුනද, තරගයට වර්ෂාවෙන් බාධා පැමිණිමත් සමග තරගය ප.ව 3.40 ආරම්භ විය.

පළමු පන්දුවාරයේදීම ජස්ප්‍රිට් බුම්රා ලබාදුන් සාර්ථක ආරම්භයත් සමගින් දිමුත් කරුණාරත්න වෙනුවට කණ්ඩායමට එක් වූ කුසල් ජනිත් පෙරේරා ලකුණු ලබා ගැනීමටත් පෙරාතුවම නැවතත් ක්‍රීඩාගාරයට හරවා යැවීමට කටයුතු කළේ ශ්‍රී ලංකා ලකුණු පුවරුව ලකුණු 1කට කඩුලු 1ක් බවට පත් කරමනි. ඉන් ආරම්භ වූ ශ්‍රී ලංකා පිතිකරුවන්ගේ දියාරු පිතිහරඹයෙන් උපරිම ප්‍රයෝජන ලබාගත් මොහොමඩ් සිරාජ්, ඔහු යැවූ පළමු පන්දුවාරයෙන් ම කඩුලු 4ක් බිද දැමීමට කටයුතු කළේ තරගයේ සම්පූර්ණ වාසිය ඉන්දියාව වෙත නතුකර දෙමිනි. ඔහුගේ පන්දුවාරයේදී පැතුම් නිශ්ශංක ( ලකුණු 2 ), සදීර සමරවික්‍රම ( ලකුණු 0 ), චරිත් අසලංක ( ලකුණු 0 ) සහ ධනංජය ද සිල්වා ( ලකුණු 4 ) දවා ගැනීමට කටයුතු කළේය. 

ශ්‍රී ලංකා මුල්පෙළ සහ මැද පෙළ සියල්ල ක්‍රීඩාංගණයේ නරඹන්නන් බවට පත් වෙද්දී, පිටියට එක් වූ නායක දසුන් ශානකටද මුහුණ දීමට හැකි වූයේ පන්දු 4ක් පමණි. මොහොමඩ් සිරාජ්ගේ පන්දුවක් හමුවේ ලකුණු නොලබාම දැවී යාමට ශානකට සිදු වූ අතර ඒ වනවිට ශ්‍රී ලංකා ලකුණු පුවරුව සටහන් වූයේ කඩුලු 6කට ලකුණු 12 ලෙසය. ඒ වනවිට ශ්‍රී ලංකා කන්ඩායම මුහුණ දී තිබුනේ පන්දුවාර 5.4ක් පමණි.

සියල්ල අසාර්ථක වෙද්දී, එක් අන්තයක අසරණ වූ කුසල් මෙන්ඩිස් ශ්‍රී ලංකා ඉනිම ගොඩ නැගීමට උත්සාහ කළද, එයට ද මොහොමඩ් සිරාජ්ගෙන් අවස්ථාවක් හිමි නොවීය. කුසල් මෙන්ඩිස්ගේ කඩුල්ලද දවාගත් මොහොමඩ් සිරාජ් තම එක්දින පිටියේ යැවූ හොඳම පන්දු යැවීම වාර්තා කළේය.

කුසල් මෙන්ඩිස් ( ලකුණු 17 )  හැරෙන්න ශ්‍රී ලංකා ඉනිමේ ලකුණු 10 සීමාව පසුකළ එකම ක්‍රීඩකයා වූයේ මහීෂ් තීක්ෂන වෙනුවට කණ්ඩායමට එක් වූ දුශාන් හේමන්ත පමණි. ඔහු සිය කඩුල්ල ආරක්ෂා කර ගනිමින් නොදැවී ලකුණු 13ක් ලබා ගනිමින් සිය අන්තයේ රැදී සිටියද ඒ වනවිට ශ්‍රී ලංකා ඉනිමේ කඩුලු 10 දැවී ගොස් අවසන්ය.

මොහොමඩ් සිරාජ් ශ්‍රී ලංකා මුල්පෙළ සහ මැද‌පෙළ විනාශ කරද්දී, ඔහුට අනගි සහයක් ලබාදුන් හර්දික් පාණ්ඩ්‍යා පසුපෙළ පිතිකරුවන් වූ දුනිත් වෙල්ලාලගේ ( ලකුණු 8 ), ප්‍රමොද් මධුෂාන් ( ලකුණු 0 ) සහ මතීෂ පතිරණ ( ලකුණු 0 ) බිද දැමීමට කටයුතු කළේය.

ඒ අනුව ජයග්‍රහණය සඳහා ලකුණු 51ක පහසු ඉලක්කය හඹා යාමට පිටියට පිවිසි ශුබ්මන් ගිල් ( නොදැවී 27 ) සහ ඉෂාන් කිෂාන් ( නොදැවී 23 ) ලබා ගනිමින් තරගය පහසුවෙන්ම ජයග්‍රහණය කළහ.

මොහොමඩ් සිරාජ් අවසන් තරගයේ වීරයා බවට ‌පත් වෙද්දී, කුල්දීප් යාදේව් තරගාවලියේ වීරයා බවට පත් විය.

ආසියානු කුසලාන ක්‍රිකට් තරගාවලියේ පාකිස්තානයට එරෙහිව පැවති තීරණාත්මක තරගයෙන් අවසන් මොහොතේ කඩුලු 2ක ජයත් ලැබූ ශ්‍රී ලංකා කණ්ඩායම මෙවර තරගාවලියේ අවසන් මහා තරගයට සුදුසුකම් ලැබීමට අද අලුයම ( 15 වැනිදා ) සමත් විය. ඒ අනුව මේ මස 17 වැනිදා ඉන්දියාව සමගින් ශ්‍රී ලංකාව කොළඹ ආර්. ප්‍රේමදාස ක්‍රීඩාංගණයේදී අවසන් තරගයට මුහුණ දීමට නියමිතය.

ජයග්‍රහණය සඳහා ලකුණු 252ක ඉලක්කය හඹාගිය ශ්‍රී ලංකා කණ්ඩායම කඩුලු 8ක් දැවී සිය ජයග්‍රහණය තහවුරු කළේ අවසන් පන්දුවේදීය. චරිත් අසලංක ඩීප් ස්කෙයාර් ලෙග් කළාපයට පන්දුව යොමු කරමින් අවසන් පන්දුවට ජයග්‍රාහී ලකුණු 2 සම්පූර්ණ කිරීමට සමත් වූයේ ශ්‍රී ලංකා කණ්ඩායම 11 වන වරටත් ආසියානු කුසලාන අවසන් මහා තරගයට ගෙන යමිනි.

ශ්‍රී ලංකා කණ්ඩායමේ ජයග්‍රහණය තහවුරු චරිත් අසලංක පන්දු 47කදී හයේ පහරක් සහ හතරේ පහර 3ක් සමගින් නොදැවී ලකුණු 49ක් රැස් කිරීමට සමත් විය.

මෙවර තරගාවලයේ තෙවැනි අර්ධ ශතකය ලබාගත් කුසල් මෙන්ඩිස් පන්දු 87කදී හයේ පහරක් සහ හතරේ පහර 8ක් සමගින් ලකුණු 91ක් රැස් කිරීමට සමත් වූ අතර ඔහු මෙවර තරගාවලියේ ශතකය පෙනී පෙනී දැවී ගිය දෙවැනි අවස්ථාව බවට එය පත්විය. ඔහුට අනගි සහයක් ලබාදුන් සදීර සමරවික්‍රම පන්දු 51කද හතරේ පහර 4ක් සමගින් ලකුණු 48ක් රැස් කිරීමට සමත් විය.

පන්දු යැවීමේදී ඉෆ්තිකර් අහමඩ් ලකුණු 50කට කඩුලු 3ක් සහ ශහීන් ශා අෆ්රීඩි ලකුණු 52කට කඩුලු 2 බැගින් බිද දැමීමට සමත් වූහ.

කාසියේ වාසිය ජයග්‍රහණය කරමින් පළමුවෙන් පන්දුවට පහර දුන් පාකිස්තාන කණ්ඩායම පන්දුවාර 42කදී කඩුලු 7කට ලකුණු 252ක් රැස් කිරීමට සමත් විය. මෙම තරගය පන්දුවාර 50 තරගයක් ලෙස පැවැත්වීමට නියමිතව තිබුනද තරගයට වර්ෂාවෙන් බාධා පැමිණිමත් සමග එක් ඉනිමක් පන්දුවාර 42කට සීමා කිරීමට තරග තීරකවරු තීරණය කළහ.

පාකිස්තානය වෙනුවෙන් විශිෂ්ට ඉනිමක් ක්‍රීඩාකළ මොහොමඩ් රිස්වාන් පන්දු 73කදී නොදැවී ලකුණු 86ක් රැස් කිරීමට සමත් විය. ඔහුගේ ඉනිමට හයේ පහර 2ක් සහ හතරේ පහර 6ක් ඇතුළත් විය. අබ්දුල්ලා ශෆීක් ( ලකුණු 52 ) සහ ඉෆ්තිකර් අහමඩ් ( ලකුණු 47 ) බැගින් රැස් කරමින් ශ්‍රී ලංකාවට අභියෝගාත්මක ලකුණු පුවරුවක් ගොඩ නැගීමට කටයුතු කළහ.

පන්දු යැවීමේදී මතීෂ පතිරණ ලකුණු 65කට කඩුලු 3ක් සහ ප්‍රමොද් මධුෂාන් ලකුණු 58කට කඩුලු 2 බැගින් බිද හෙලීමට සමත් වූහ.

විරාට් කෝලිගේ සහ කේ. එල් රාහුල්ගේ විශිෂ්ට පිතිහරඹයත්, කුල්දීප් යාදේව්ගේ විශිෂ්ට පන්දු යැවීමත් හමුවේ පාකිස්තානයට එරෙහිව පැවති සුපිරි සිව්දෙනාගේ වටයේ තරගයෙන් ලකුණු 228ක දැවැන්ත ජයක් ලැබීමට ඉන්දීය කණ්ඩායම අද ( 11 වැනිදා ) සමත් විය. මෙම තරගය කොළඹ ආර්. ප්‍රේමදාස ක්‍රීඩාංගණයේදී ඊයෙ ( 10  වැනිදා ) ආරම්භ වුවද, තරගයට වර්ෂාවෙන් බාධා පැමිණිමත් සමග අද ( 11 වැනිදා ) දිනයේදීද පැවැත්වීමට සිදුවිය.

ජයග්‍රහණය සඳහා ලකුණු 357ක දැවැන්ත ඉලක්කය හඹා යාමට පිටියට පිවිසි පාකිස්තාන කණ්ඩායමට පන්දුවාර 32කදී කඩුලු 8ක් දැවී ලබාගත හැකි වූයේ ලකුණු 128ක් පමණි.

පාකිස්තාන ඉනිමේ එකදු පිතිකරුවෙකුටවත් ලකුණු 30 සීමාව පසුකර යාමට ඉන්දීය පන්දු යවන්නන්ගෙන් අවස්ථාවක් හිමි නොවූ අතර, ෆකර් සමාන් ( ලකුණු 27 ) , අගා සල්මන් ( ලකුණු 23 ) සහ ඉෆ්තිකර් අහමඩ් ( ලකුණු 23 ) බැගින් රැස් කිරීමට සමත් වූහ.

පන්දු යැවීමේදී කුල්දීප් යාදේව් ලකුණු 25කට කඩුලු 5ක් බිද දමද්දී, ජස්ප්‍රිට් බුම්රා, හර්දික් පාණ්ඩ්‍යා සහ ශර්දුල් තකූර් අතරේ කඩුල්ල බැගින් බෙදී ගියහ.

කාසියේ වාසිය ජයග්‍රහණය පාකිස්තාන නායකයා පළමුවෙන් පන්දුවට පහර දීමට ඉන්දීය කණ්ඩායමට ආරාධනා කරසිටි අතර, ඒ අනුව පිටියට පිවිසි ඉන්දීය කණ්ඩායම නියමිත පන්දුවාර 50 අවසානයේ කඩුලු 2ක් පමණක් දැවී ලකුණු 356ක් රැස් කිරීමට සමත් විය.

ඉන්දීය කණ්ඩායමට සාර්ථක ආරම්භයක් ලබාදුන් නායක රොහිත් ශර්මා ( ලකුණු 56 ) සහ ශුබ්මන් ගිල් ( ලකුණු 58 ) රැස් කරමින් අර්ධ ශතක ලබද්දී, තෙවැනි සහ සිව්වන පිතිකරුවන් ලෙස පිටියට පිවිසි විරාත් කෝලි සහ කේ.එල් රාහුල් ශතක ලබා ගනිමින් පාකිස්තාන පන්දු යවන්නන්ට පහර පිට පහර එල්ල කරන්නට වූහ.

තම ක්‍රිකට් දිවියේ 47වැනි එක්දින ශතකය ලබාගත් විරාට් කෝලි පන්දු 94කදී හයේ පහර 3ක් සහ හතරේ පහර 9ක් සමගින් නොදැවී ලකුණු 122 ක් ලබා ගැනීමට සමත් විය. ඒ අනුව ජාත්‍යන්තර ක්‍රිකට් පිටියේ අඩුම ඉනිම් සංඛ්‍යාවකින්  වේගවත්ම එක්දින ලකුණු 13,000 සීමාව පසුකර යාමට ද කෝලිට අවස්ථාව හිමි විය. ඔහුට අනගි සහයක් ලබාදුන් කේ. එල් රාහුල් පන්දු 106කදී හයේ පහර 2ක් සහ හතරේ පහර 10ක් සමගින් නොදැවී ලකුණු 111ක් ලබා ගැනීමට කටයුතු කළේ සිය එක්දින පිටියේ 6 වැනි ශතකයද ලබා ගනිමිනි.

පන්දු යැවීමේදී ශඩාබ් ඛාන් සහ ශහීන් අෆ්රීඩි අතරේ කඩුල්ල බැගින් බෙදී ගියහ.

ඉන්දීය කණ්ඩායම සහ ශ්‍රී ලංකා කණ්ඩායම අතර පැවැත්වෙන සුපිරි සිව්දෙනාගේ වටයේ තරගය හෙට ( 12 වැනිදා ) කොළඹ ආර් ප්‍රේමදාස ක්‍රීඩාංගණයේදී ප.ව 3.00ට ආරම්භ වීමට නියමිතය.

ඡායාරූප – ක්‍රික්ඉන්ෆෝ ඇසුරෙනි

ආසියානු කුසලාන ක්‍රිකට් තරගාවලියේ සුපිරි සිව්දෙනාගේ වටයේ දෙවැනි තරගයෙන් බංග්ලාදේශයට එරෙහිව ලකුණු 21ක ජයක් ලැබීමට ශ්‍රී ලංකා කණ්ඩායම අද ( 9 වැනිදා ) සමත් විය. මෙම තරගය කොළඹ ආර් ප්‍රේමදාස ක්‍රීඩාංගණයේදී පැවැත්විණ. ශ්‍රී ලංකා කණ්ඩායමේ මෙම ජයග්‍රහණයත් සමගින් බංග්ලාදේශය සුපිරි සිව්දෙනාගේ වටයේ දෙවැනි පරාජයද වැළද ගත්තේය.

ජයග්‍රහණය සඳහා ලකුණු 258ක ඉලක්කය හඹාගිය බංග්ලාදේශ කණ්ඩායමට පන්දුවාර 48.1 කදී සියලු දෙනාදැවී ලබාගත හැකි වූයේ ලකුණු 236ක් පමණි.

යොවුන් පිතිකරු තවුහිද් රිදෝයි අවසන් මොහොත තෙක් සටන් කරමින් බංග්ලාදේශය ජයග්‍රහණය වෙත රැගෙන යාමට උත්සාහ කළද, එයට මහීෂ් තීක්ෂනගෙන් අවස්ථාවක් හිමි නොවීය. තවුහිද්, තීක්ෂණගේ පන්දුවක් හමුවේ දැවී යනවිට පන්දු 97කදී හයේ පහරක් සහ හතරේ පහර 7ක් සමගින් ලකුණු 82ක් ලබා තිබුණි.

සෙසු පිතිකරුවන් වූ  මුෂෆිකර් රහීම් ( ලකුණු 29 ) සහ මෙහෙදි හසන් ( ලකුණු 28 ) බැගින් රැස් කිරීමට සමත් වූවද ඔවුන්ටද දිගු ඉනිමක් ගොඩ නැගීමට ශ්‍රී ලංකා පන්දු යවන්නන්ගෙන් අවස්ථාවක් හිමි නොවූහ.

විශිෂ්ට පන්දු යැවීමක නිරත වූ නායක දසුන් ශානක තරගයේ ආරම්භයේ සිටම සිය වගකීම තමන්ගේ අතට ගනිමින් පන්දුවාර 9කදී ලකුණු 26කට කඩුලු 3ක් බිද හෙලීමට සමත් විය. ඔහුට අනගි සහයක් ලබාදුන් මතීෂ පතිරණ සහ මහීෂ් තීක්ෂණ කඩුලු 3 බැගින් බිද දමද්දී, යොවුන් ක්‍රීඩක දුනිත් වෙල්ලාලගේ නියමිත පන්දුවාර 10ට ලකුණු 18ක් පමණක් ලබා දෙමින් කඩුල්ලක්ද බිද හෙලීමට සමත් වූයේ විශිෂ්ට පන්දු යැවීමක නිරත වෙමිනි.

කාසියේ වාසිය ජයග්‍රහණය කළ බංග්ලාදේශ නායක ශකීබ් අල් හසන් පළමුවෙන් පන්දුවට පහර දීමට ශ්‍රී ලංකා කණ්ඩායමට ආරධනා කළ අතර ඒ අනුව පිටියට පිවිසි ශ්‍රී ලංකා කණ්ඩායම නියමිත පන්දුවාර 50 අවසානයේ කඩුලු 9ක් දැවී ලකුණු 257ක් රැස් කිරීමට සමත් විය.

ශ්‍රී ලංකාව වෙනුවෙන් විශිෂ්ට ඉනිමක් ක්‍රීඩාකළ සදීර සමරවික්‍රම පන්දු 72කදී හයේ පහර 2ක් සහ හතරේ පහර 8ක් සමගින් ලකුණු 93ක් රැස් කිරීමට සමත් වූයේ සිය එක්දින ක්‍රිකට් පිටියේ පෞද්ගලික හොඳම ඉනිම ක්‍රීඩා කරමිනි. ඔහුට අනගි සයහක් ලබාදුන් කුසල් මෙන්ඩිස් මෙවර තරගාවලියේ සිය දෙවැනි අර්ධ ශතකය ලබා ගැනීමට කටයුතු කළේය. ඒ පන්දු 73කදී හයේ පහරක් සහ හතරේ පහර 6ක් සමගින් ලකුණු 50ක් ලබා ගනිමිනි. පැතුම් නිශ්ශංක ( ලකුණු 40 ) සහ නායක දසුන් ශානක ( ලකුණු 24 ) බැගින් ලබා ගනිමින් ශ්‍රී ලංකා ඉනිම ගොඩ නැගීමට සිය දායකත්වය ලබා දුන්හ.

පන්දු යැවීමේදී හසන් මහ්මුද් සහ ටස්කින් අහ්මඩ් අතරේ කඩුලු 3 බැගින් බෙදී ගියහ.

ශ්‍රී ලංකා කණ්ඩායම සහභාගී වන මීලග තරගය මේ මස 12 වැනිදා ඉන්දිය කණ්ඩායමට එරෙහිව පැවැත්වීමට නියමිතය.

ආසියානු කුසලාන ක්‍රිකට් තරගාවලියේ සුපිරි සිව්දෙනාගේ වටය අරඹමින් පැවැති පළමු තරගයෙන් බංග්ලාදේශයට එරෙහිව කඩුලු 7ක ජයක් ලැබීමට සත්කාරක පාකිස්තාන කණ්ඩායම අද ( 6 වැනිදා ) සමත් විය. මෙම තරගය පාකිස්තානයේ ගඩාෆි ක්‍රීඩාංගණයේදී පැවැත්විණ.

ජයග්‍රහණය සඳහා ලකුණු 194ක ඉලක්කය හඹාගිය පාකිස්තාන කණ්ඩායම පන්දුවාර 39.3කදී කඩුලු 3ක් පමණක් දැවි සිය කඩයිම පසුකර ගියහ.

විශිෂ්ට පිතිහරඹයක නිරත වූ ඉමාම් උල් හක් ( ලකුණු 78 ) සහ මොහොමඩ් රිස්වාන් ( නොදැවී 63 ) ලබා ගනිමින් පාකිස්තාන කණ්ඩායමේ ජයග්‍රහණය ඉක්මන් කළහ.

පන්දු යැවීමේදී ටස්කින් අහමඩ්, ශොරිෆුල් ඉස්ලාම් සහ මෙහෙදි හසන් අතරේ කඩුල්ල බැගින් බෙදී ගියහ.

කාසියේ වාසිය ජයග්‍රහණය කරමින් පළමුවෙන් පන්දුවට පහරදුන් බංග්ලාදේශ කණ්ඩායමට පන්දුවාර 38.4කදි සියලුදෙනා දැවී රැස්කර ගතහැකි වූයේ ලකුණු 193ක් පමණි.

බංග්ලාදේශය වෙනුවෙන් මුෂ්ෆිකර් රහීම් ලකුණු 64 ක් සහ නායක ශකිබ් අල් හසන් ලකුණු 53 බැගින් රැස් කිරීමට සමත් වුවද, සෙසු පිතිකරුවන්ට ලකුණු 20 සීමාවවත් පසුකර යාමට අවස්ථාවක් හිමි නොවූහ.

විශීස්ට පන්දු යැවීමක නිරත වූ හරිස් රයුෆ් ලකුණු 19කට කඩුලු 4ක් සහ නසීම් ශා ලකුණු 34කට කඩුලු 3බැගින් බිද හෙලූහ.