“ඒක වුණේ අමුතු විදිහට.ඒ කාලෙ කළු තමයි අපේ කඩුලු රකින්නා.එයා බැට් කලේ පසුපෙළ පිතිකරුවෙක් විදිහට.ඒ කාලෙ එයාගෙ කඩුලු රැකීම එතරම් හොඳ නෑ.හැම තරගයකම මොකක් හරි අවස්ථාවකක් මගහැරෙනවා.හැබැයි හොඳට බැට් කරනවා.මේක මෙහෙම යන්න බැහැ.දවසක් අර්ජුන කිව්වා කළුව ඉස්සරහට ගේන්න වෙනවා කියල.මටත් හිතුනා ඒක තමයි කරන්න හොඳම දේ කියල.හොඳට බැට් කරනකොට ඒකෙන් ලැබෙන විශ්වාසය නිසා එයාගෙ කඩුලු රැකීම හරි යයි කියල අපි විශ්වාස කලා.සනත් කොහොමත් එතන බැට් කරනවා.අන්තිමට අපි තීරණය කලා මේ දෙන්නව OPENකරවන්න.මුලදි එතරම් සාර්ථක නොවුනත් පස්සෙ ටික ටික සාර්ථක වුණා. ඒකෙන් කළුගෙ කඩුලු රැකීමත් වර්ධනය වුණා.ලෝක කුසලානයට යනකොට මේ දෙන්නා නියම මට්ටමට ආවා. ඒක අපිට ලොකු ශක්තියක් වුණා ලෝක කුසලානය දිනාගන්න.මොකද මේක ගොඩාක් අය දැනගෙන හිටියෙ නැහැ.එයාල දැනගන්නකොට ලෝක කුසලානය දිනල ඉවරයි.”

ඉහත ප්‍රකාශය කරනු ලැබුවෙ 1996 ලෝක කුසලානය දිනා ගන්නා විට ශ්‍රී ලංකා කණ්ඩායමේ කලමණාකරු ලෙස කටයුතු කල දුලිප් මෙන්ඩිස්ය.1996 ජනවාරි මස 09වනදා ඔස්ට්‍රේලියාවේ පැවති බෙන්සන් ඇන්ඩ් හෙජස් තරඟාවලිය අතර තුරදී දුලිප්,වට්මෝර් ,අර්ජුන,අරවින්ද ඇතුලු පිරිස විසින් ගනු ලැබූ මෙම තීරණය නිසා ක්‍රිකට් ලොවම මේ තරම් කනපිට පෙරළේ යැයි ඇතැම් විට ඔවුන් පවා නොසිතන්නට මෙම ඔස්ට්‍රේලියානු සංචාරයට මාස දෙකකට පමණ පෙර සාජා හි පැවති තුන්කොන් තරඟාවලිය යටතේ ශ්‍රී ලංකාව හා බ.ඉ.කොදෙව්වන් අතර පැවති තරඟයකදී ශ්‍රී ලංකාවට ජයග්‍රහණය සඳහා ලකුණු 334ක් ලබාගත යුතු විය.මෙම ඉලක්කය හඹා යාමේදී එදා අංක 3 පිතිකරු ලෙස අරවින්ද සිල්වා පැමිණි අතර ඔහුගේ දැවී යාමෙන් පසු අංක 4 පිතිකරු ලෙස පිටියට පිවිසියේ රොමේෂ් කළුවිතාරණය.එම යුගයේදී එක්දින ඉනිමක පලමු පන්දුවාර 15 තුලදී යාර 30 සීමාවෙන් පිටත රැඳවිය හැක්කෙ පන්දු රකින්නන් දෙදෙනෙකු පමණි.අරවින්ද දැවී යන විට ශ්‍රී ලංකා ඉනිමේ අවසන් වී තිබුණේ පන්දුවාර 7ක් පමණි.අනතුරුව පැමිණි කළුවිතාරණ පන්දු රකින්නන්ගේ හිස් වලට ඉහළින් පන්දුවට පහර දෙමින් පන්දු 20ක් තුල හතරේ පහර 4ක් සහ හයේ පහර 2ක්ද සහිතව වේගවත් ලකුණු 31ක් ලබා ගත්තේය.

දුලිප් පැවසූ අනෙකුත් කාරණා සේම කළුවිතාරනව ආරම්භක පිතිකරුවකු ලෙස යොදා ගැනීමට මෙම කාරණයද අමතර හේතුවක් වන්නට ඇතැයි විශ්වාස කල හැකිය.1995-96 බෙන්සන් ඇන්ඩ් හෙජස් තරඟාවලියේ ශ්‍රී ලංකාව මුහුණ දුන් පලමු තරඟ තුනේදීම ඉනිම ආරම්භ කරනු ලැබුවේ සනත් ජයසූරිය සමඟ රොෂාන් මහනාමය.මෙම තරඟ තුනෙදීම ආරම්භය යහපත් නොවීය.කොදෙව්වන් සමඟ පැවති හතරවන තරගයේදී ජයසූරිය සමඟ චන්දික හතුරුසිංහ ඉනිම ආරම්භ කලද එයද අසාර්තක විය.සනත්-කළු සුසංයෝගය ආරම්භක පිතිකරුවන් ලෙස පැමිණියේ 1996 ජනවාරි 9වනදා ඔස්ට්‍රේලියාව සමග මෙල්බර්න් හි පැවති තරඟයේදීය..පලමු තරඟ දෙකේදී සුසංයෝගයක් ලෙස සාර්ථක නොවුනද කළුවිතාරන පිතිකරුවකු ලෙස සාර්තක විය.අනතුරුව කොදෙව්වන් සමඟ පර්ත් හි පැවති තරගයෙිදී පලමු කඩුල්ලට ලකුණු 80ක සබඳතාවක් පවත්වමින් සාර්තක ආරම්භයක් පැවැත්වීමට මොවුන් දෙදෙනා සමත් විය.ආරම්භක පිතිකරුවකු ලෙස පැමිණීමෙන් පසු අර්ධ ශතක 3ක් ලබා ගැනීමට සමත් වූ කළුවිතාරන තරගාවලියේ අවසන් වටයේ වීරයා ලෙසද සම්මාන ලැබීය.

ලෝක කුසලාන තරඟාවලියේදී මොවුන් දෙදෙනාගෙ ප්‍රහාරය පිළිබඳව බොහෝ දෙනෙකු දන්නා නිසා එ් ගැන කතාකිරීමටඅවශය නෙමැති වුවද එ් නිසා අපට අත් වූ අමතර වාසි පිළිබදව යම් සටහනක් තැබීමට සිතුවෙමි.

එම යුගයේදී බොහෝ කණ්ඩායම් ශ්‍රී ලංකාව සමඟ පවත්වන තරඟයකදී වැඩි අවදානයක් යොමුකරනු ලබන්නේ අරවින්ද සිල්වාගෙ කඩුල්ල පිළිබඳවය.එහෙත් මෙම කසකාරයින් දෙදෙනා පන්දුවාර 10ක් ක්‍රීඩා කළ හොත් ලකුණු 100ක් පමණ ලකුණු පුවරුවට එක් වේ. මේ නිසා අරවින්දට වඩා මොවුන් දෙදෙනා පිළිබඳව අවදානය යොමු කිරීමට සෙසු කණ්ඩායම් වලට සිදු විය.මේ නිසා අරවින්දට තිබූ අවදානම තරමක් අඩු විය.ඒ් හේතුවෙන් අරවින්දගේ GAME එක පීඩනයකින් තොරව කරගෙන යාමට ඔහුට හැකි විය.අවසන් පූර්ව තරඟයේ දී මෙන්ම අවසන් මහ තරගයේදීද එයින් අපට මහගු ප්‍රයෝජන අත් විය.

තවත් කාරණයක් නම් එම යුගයේදී හෂාන්ගෙන් පසුව එනම් නොම්මර 7ස්ථානයේ පන්දුවට පහර දී තරගයක් වෙනස් කිරීමට හැකියාව ඇති ස්ථාවර පිතිකරුවකු අප සතුව සිටියේ නැත.කළුවිතාරණ ආරම්භක පිතිකරුවකු ලෙස පැමිණ එම ස්ථානයට රොෂාන් මහානාම පැමිණි පසු අපගේ එම අඩුපාඩුවද මග හැරිණි.සනත් කලූ දෙදෙනා ඉනිම ආරම්භ කල තරගයේදී ශ්‍රී ලංකාවට ජයග්‍රහණය සඳහා ලැබුණු ඉලක්කය ලකුණු 214කි.වරෙක ලකුණු 147කට කඩුලු 6ක් දැවී අවදානම් අඩියක සිටි ශ්‍රී ලංකා පිල කුමාර ධර්මසේන සමඟ එක්ව අර්ධ ශතකයක් පවා රැස් කරමින් තරඟය ජයග්‍රහණය කරා රැගෙන ගියේ රොෂාන් මහානාමය.තවද කොදෙව්වන් සමග පැවති පැවති තරගයකදී ද ලකුණු 121කට කඩුලු 6ක් දැවී තිබියදී ද අර්ධ ශතකයක් ලබා ගනිමින් ජයග්‍රාහී ලකුණු මට්ටමකට ශ්‍රී ලංකා කණ්ඩාම රැගෙන ගියේ මහානාමය.එපමණක්ද නොව ලෝක කුසලාන තරගාවලියේ එංගලන්තය සමඟ පැවති අර්ධ අවසන් පූර්ව තරගයේ දීද ශ්‍රී ලංකා පිල යම් අවදානම් තත්වයක සිටියදී හෂාන් -රොෂාන් සුසංයෝගය එක්වශ්‍රී ලංකා පිල තරගයේ ජයග්‍රහණය වෙත රැගෙන ගියේය.

එපමණක්ද නොව සනත්- කළු සුසංයෝගය තුල තිබූ මෙම අවබෝධය නිසා පන්දු රැකීමේදී ද ශ්‍රී ලංකා පිලට අමතර වාසි අත් විය. ලෝක කුසලාන අවසන් පූර්ව තරඟයේ සචින් තෙන්දුල්කාර්ගෙ දැවී යාම ඊට කදිම උදාහරණයකි.ජයසූරියගේ අතින් පන්දුව මුදාහරින විටම කළුවිතාරන තමන්ගේ පා ඉන්න දෙසට යොමුවන ආකාරය එම දැවීයාම සියුම්ව නිරීක්ෂණය කලහොත් දැක ගත හැකිය.
පන්දුව වේලාසනින් දැකීම,ක්ෂණිකව පහරට යොමු වීම,අත දිගහැර පන්දුවට රිදෙන්නට පහරදීම පමණක් නොව කඟවේනන් දෙදෙනෙකු සේ කඩුලු අතර දිව යාමද මුසු වූ මෙම සනත්-කළු සුසංයේගය විසින් ජගත් ක්‍රිකට් පිටිය තුල පෑ වික්‍රමය මෙරට ක්‍රීඩා ලෝලීන්ගේ සිත් තුල සදා අමරණීය සිහිවටන ලෙස තැන්පත් වී ඇතුවාට කිසිඳු සැකයක් නොමැත.

සමන් රණවකආරච්චි

1999 ලෝක කුසලාන තරගාවලියේ සුපර් සික්ස් වටයේ 9වන තරගය ඔස්ට්‍රේලියාව සහ දකුණු අප්‍රිකාව අතර පැවැත්වුනේ එංගලන්තයේ ලීඩ්ස් නුවර හෙඩිංග්ලි පිටියේදි. දිනය 1999 ජුනි මස 13 වෙනිදා.
මේ තරගය ඔස්ට්‍රේලියාවට ඉතා වැදගත් වූයේ අවසන් පූර්ව වටයට සුදුසුකම් ලැබීමටනම් ඔවුන් මේ තරගය ජයගතයුතුම වූ නිසා. තරගාවලියේ ප්‍රබලතම කණ්ඩායම වූ දකුණු අප්‍රිකාව ඒ වනවිටත් අවසන් පූර්ව වටයට සුදුසුකම් ලබා සිටියා.

කාසියේ වාසිය දිනා පන්දුවට පහරදුන් දකුණු අප්‍රිකාව පන්දුවාර 50 අවසානයේ කඩුළු 7කට ලකුණු 271ක් ලබාගත්තා. හර්ෂල් ගිබ්ස් ලකුණු 101. ඩැරල් කලිනන් ලකුණු 50. වේගවත් අවසානයක් ලබාදුන් ජොන්ටි රෝඩ්ස් පන්දු 36කින් ලකුණු 39කුත් ලාන්ස් ක්ලූස්නර් පන්දු 21කින් ලකුණු 36කුත් වාර්තා කලා.

පන්දු යැවීමේදි ඩෙමියන් ෆ්ලෙමින් ලකුණු 57ට කඩුළු 3. සුපිරි පන්දු යැවීමක නිරතවූ ෂේන් වෝන් පන්දුවාර 10දී ලකුණු 33කට කඩුළු 2ක් දවා ගත්තා.

ලකුණු 272ක ජයග්‍රාහි ඉලක්කයක් හඹා යන්නට පිටියට පිවිසි ඔස්ට්‍රේලියාවේ ආරම්භය අසාර්ථක වූයේ ඇඩම් ගිල්ක්‍රිස්ට් දෙවන පන්දුවාරයේදිත් මාක් වෝ හයවන පන්දුවාරයේදිත් දැවීයාම නිසා. ඔවුන් දෙදෙනාම රැස් කලේ ලකුණු 5 බැගින්.

12වන පන්දුවාරයේදී ඩේමියන් මාටින් ලකුණු 11කට දැවී යද්දී ලකුණු පුවරුව දැක්වුනේ ලකුණු 48ට කඩුළු 3ක් ලෙස. රිකී පොන්ටින් සමග එක්වුණු නායක ස්ටීවි වෝ ලකුණු පුවරුව ඉහළ නංවමින් ඔස්ට්‍රේලියා ඉනිම ස්ථාවර තත්වයකට රැගෙන ආවා.

31 වන පන්දුවාරයේදී ඔස්ට්‍රේලියාව කඩුළු 3කට ලකුණු 152ක් ලබාගෙන සිටියා. ලාන්ස් ක්ලූස්නර් යැවූ එම පන්දුවාරයේ අවසන් පන්දුවට ස්ටීව් වෝ එල්ලකල පහර උඩපන්දුවක් ලෙස ඇදීගියේ ෂෝට් මිඩ්විකට් හි පන්දු රකිමින් සිටි හර්ෂල් ගිබ්ස් අතට.

උඩපන්දුව රැකගත් ගිබ්ස් ඒ සමගම පන්දුව උඩදමා දවාලීම සැමරීමට යද්දී පන්දුව අතින් ගිලිහී බිම වැටුණා. මේ වෙලාවේ ගිබ්ස් වෙත හැරුණු ස්ටීව් වෝ “Mate you just dropped the world cup” යනුවෙන් පැවසුවා.

විස්තර විචාරයේ සිටි ටෝනි ග්‍රෙග් මෙවැනි පහසු උඩපන්දුවක් ගිබ්ස් වැන්නෙක් අත්හැරීම අදහාගත නොහැකි බවත් මෙයින් තරගයේ ගමන්මග වෙනස් වන බවත් කියා සිටියා. හර්ෂල් ගිබ්ස් කියන්නේ එසේ මෙසේ කෙනෙක් නොවෙයි. එකල ගිබ්ස් ව හැදින්වූයේ ජොන්ටි රෝඩ්ස්ට පසු සිටින හොදම පන්දු රකින්නා ලෙසයි.

ලකුණු 69ක් ලැබූ රිකී පොන්ටින් සමග ලකුණු 126ක සබදතාවක් පැවැත්වූ වෝ මයිකල් බෙවන්ගේ ලකුණු 27ත් ටොම් මූඩි නොදැවී ලබාගත් ලකුණු 15ත් සමග පන්දු දෙකක් ඉතිරිව තිබියදී ජයග්‍රාහි ලකුණ ඔහුගේ පිත්තෙන් ලබාගත්තා. ස්ටීව් වෝ පන්දු 110කදී ලකුණු 120ක් ලබාගත්තේ හතරේ පහර 10ක් හා හයේ පහර 2ක් සමගින්.

එම ජයත් සමග අවසන් පූර්ව වටයට සුදුසුකම් ලබන්නට ඔස්ට්‍රේලියාව සමත් වුණා. එහිදී නැවතත් ඔවුනට මුණගැසුණේ දකුණු අප්‍රිකාවමයි. ඉතිහාසගත තරගයක් වූ එම තරගය ලකුණු සමවී අවසන් වුනා.

නමුත් ඔස්ට්‍රේලියාව අවසන් තරගයට සුදුසුකම් ලැබුවේ සුපර් සික්ස් වටයේ තරගය ඔවුන් ජයගත් නිසා. ශුද්ධ ලකුණු වේගයට පෙර මුහුණට මුහුණ ප්‍රතිඵලය සලකා බැලූ නිසා ඔවුන් ඉදිරියට ගියා.

පසු කාලයකදී ස්ටීව් වෝ ප්‍රකාශ කලේ “You just dropped the world cup” යන්න මාධ්‍ය මගින් නිර්මාණය කළ එකක් බවත් තමන් ගිබ්ස් ට පැවසුවේ “You’ve just cost your team the match” යනුවෙන් බවත්. කෙසේ වෙතත් මාධ්‍යයෙන් ප්‍රචාරය වූ පාඨයට තමන්ද කැමැති බව ඔහු කියා සිටියා.

ලහිරු උදාන අබේසේකර

1992 ලෝක කුසලාන ක්‍රිකට් තරගාවලියේ දෙවන අවසන් පූර්ව තරගය පැවැත්වුනේ ඔස්ට්‍රේලියාවේ සිඩ්නි ක්‍රීඩාංගණයේදී.

මූලික වටයේ තරගවලින් පසු ලකුණු සටහනේ දෙවන ස්ථානයේ සිටි එංගලන්තයත් තුන්වෙනි ස්ථානයේ සිටි දකුණු අප්‍රිකාවත් මෙහිදී තරග වැදුනා. පලමුවරට ලෝක කුසලානයට එක්වූ දකුණු අප්‍රිකාව ප්‍රබල කණ්ඩායම් පරදවමින් අවසන් පූර්ව වටයට සුදුසුකම් ලැබුවේ මූලික වටයේ තරග 5ක් ජයගනිමින්.

වර්ෂාව නිසා තරගය ආරම්භවීම විනාඩි 10කින් ප්‍රමාද වුනත් පන්දුවාර ප්‍රමාණය අඩු නොකොට අහිමි වූ විනාඩි 10 විවේක කාලයෙන් අඩුකිරීමට තීරණය වුනා.

ප්‍රථමයෙන් පන්දුවට පහරදුන් එංගලන්තය පන්දුවාර 45කදී කඩුළු 6ක් දැවී ලකුණු 252ක් ලබාගත්තා. වැඩිම ලකුණු ලාභියා වූ ග්‍රැහැම් හික් ලකුණු 83.තරගය පන්දුවාර 50 තරගයක් වුවත් දකුණු අප්‍රිකානුවන් නියමිත කාලය තුළ පන්දුවාර 50 සමිපූර්ණ නොකිරීම නිසා තරගාවලියේ නීති අනුව එංගලන්ත ඉනිම පන්දුවාර 45කට සීමාවුනා. දකුණු අප්‍රිකාවට දඩ මුදලක් නියම වුනා.

දකුණු අප්‍රිකාවේ ජයග්‍රාහී ඉලක්කය පන්දුවාර 45කදී ලකුණු 253ක් ලෙස දැක්වුනා. මෙය දකුණු අප්‍රිකාවට ඉතා වාසි සහගත තත්ත්වයක් වුනේ එංගලන්ත ඉනිම නැවැත්වූ අවස්ථාවේ පැවති ලකුණු ගණන පමණක් ඔවුන්ට ජයග්‍රාහී ඉලක්කය වීමයි. වර්තමාන ගණනය කිරීම් අනුව බැලුවොත් ඔවුන්ගේ ඉලක්කය පන්දුවාර 45කදී ලකුණු 273ක් විය යුතුයි.

දකුණු අප්‍රිකා ඉනිම වෙනුවෙන් ඇන්ඩෘෘ හඩ්සන් ලකුණු 46ක් ලබාගත් අතර ඉනිමට ජීවය එක්කල ජොන්ටි රෝඩ්ස් පන්දු 38කින් ලකුණු 43ක් ලබාගත්තා. 42වන පන්දුවාරයේ 5වෙනි පන්දුව යවා අවසන් වූ විට ලකුණු පුවරුව දැක්වුනේ දකුණු අප්‍රිකා ඉනිම කඩුළු 6කට ලකුණු 231ක් ලෙසයි. නොදැවී ක්‍රීඩාකරමින් සිටි බ්‍රයන් මැක්මිලන් ලකුණු 20කුත් ඩේව් රිචරිඩ්සන් ලකුණු 13කුත් ලබා සිටියා.

ජයග්‍රහණය සදහා පන්දු 13කින් ලකුණු 22ක් ලබාගත යුතුව තිබුනා. තරගය දෙපිලටම දෝලනය වෙමින් තිබුණු මෙි මොහොතේ එක්වරම වර්ෂාවෙන් බාධා ඇතිවුනා. පිතිකරුවන් දිගටම තරගය පවත්වාගෙන යාමට කැමැති වුනත් එංගලන්ත නායක ග්‍රැහැම් ගූච් ඊට අකමැති වුනා. ඒ අනුව විනිසුරුවන් තරගය අතරමඟ නැවැත්වූවා.

විනාඩි 12ක ප්‍රමාදයකින් පසුව නැවත තරගය ඇරඹෙනවිට සියල්ල උඩුයටිකුරුවී තිබුනා. දකුණු අප්‍රිකාවේ ජයග්‍රාහි ඉලක්කය දැක්වුනේ එක පන්දුවකට ලකුණු 21ක් ලෙස.

වර්ෂාවෙන් පසු ගණනයකිරීම්වලදී ඔවුන්ට පන්දු 12ක් අහිමිව තිබූ අතර ඉලක්කයෙන් එක් ලකුණක් පමණක් අඩුවී තිබුනා. සිඩ්නි ක්‍රීඩාංගණයේ ලකුණු පුවරුවේ මුලින් ඉලක්කය පන්දු 7 කදී ලකුණු 21ක් ලෙස දැක්වුනත් නැවත එය නිවැරදි කොට පන්දු 1කදී ලකුණු 21ක් ලෙස ප්‍රදර්ශනය කලා.

ක්‍රිස් ලුවිස් යැවූ අවසන් පන්දුවට මිඩ්විකට් කලාපයට තට්ටුවක් දමා එක ලකුණක් ලබාගත් මැක්මිලන් කදුළුපිරි දෙනෙතින් යුතුව ක්‍රීඩාගාරයට ගියා. දකුණු අප්‍රිකානුවන්ගේ ලෝක කුසලාන සිහිනය බොදවුනේ එහෙමයි.

එතැන් පටන් පැවති කිසිදු ලෝක කුසලාන තරගාවලියක අවසන් තරගයට සුදුසුකම් ලැබීමට දකුණු අප්‍රිකාව අසමත්වුනා. 2019 හැර අනෙක් සෑම වරකදීම ප්‍රබලතම කණ්ඩායමක් ලෙස ලෝක කුසලාන තරගාවලියට පැමිණෙන ඔවුන්ට හැමදාම අනපේක්ෂිත පරාජයකින් පසු තරගාවලියෙන් ඉවත්වන්නට සිදුවුනා. 1999 සහ 2015දී ලෝක කුසලානය තිබුණේ ඔවුන්ට අත පොවනමානයේ.

2003දී තම රටේම පැවති තරගාවලියේ සුපර් සික්ස් වටයට පැමිණීමටවත් දකුණු අප්‍රිකාවට නොහැකිවුණේ ශ්‍රී ලංකාව සමග පැවති තරගයේ දී වර්ෂාව නිසා තරගය නතරකරනවිට ඩක්වර්ත් ලුවිස් සංඛ්‍යාලේඛන වරදවා වටහාගැනීම හේතුවෙන් ලකුණු සමවීමෙන්.

ලහිරු උදාන අබේසේකර