ආසියානු කුසලාන ක්‍රිකට් තරගාවලියේ සුපිරි 4 දෙනාගේ වටයේ පළමු තරගය මේ මස 6 වැනිදා පාකිස්තානයේ ලාහෝර් ක්‍රීඩාංගණයේදී ආරම්භ වීමට නියමිත අතර, සෙසු තරග සියල්ල මේ මස 9 වැනිදා සිට කොළඹ ආර් ප්‍රේමදාස ක්‍රීඩාංගණයේදී පැවැත්වීමට සැලසුම් යොදා තිබුණි.
නමුත් ලංකාවේ මේ දිනවල පවතින අයහපත් කාළගුණය ත්ත්ත්වය හේතුවෙන් ඉදිරි තරග කොළඹ ආර්.ප්‍රේමදාස ක්‍රීඩාංගණයේදී පැවැත්වීමට හැකියාවක් පවතීද යන්න මේ වනවිට ගැටලු සහගතය. මේ හේතුවෙන් සෙසු තරග සියල්ල පල්ලේකැලේ ක්‍රීඩාංගණයේදීම හෝ දඹුල්ල ජාත්‍යන්තර ක්‍රිකට් ක්‍රීඩාංගණයේදී පැවැත්වීමට සාකච්ඡා අරඹා ඇති මුත් ඒ අතරට හම්බන්තොට මහින්ද රාජපක්ෂ ක්‍රීඩාංගණයේදී සෙසු තරග පැවැත්විමටද තරග සංවිධායකයෝ සාකච්ඡා කරමින් පවතින බව ක්‍රිකට් ආරංචි මාර්ග තහවුරු කරයි.
නමුත් මේ සම්බන්ධයෙන් ආසියානු ක්‍රිකට් කවුන්සිලය හෝ ශ්‍රී ලංකා ක්‍රිකට් ආයතනය මාධ්‍ය වෙත තවමත් නිශ්චිතව දන්වා නොමැත.
වර්ෂාව හේතුවෙන් ඉන්දීය – පාකිස්තාන තරගයද අතහැර දැමීමට තරග සංවිධායකයෝ තීරණය කළ අතර අද ( 4 වැනිදා ) ඉන්දීය නේපාල තරගයටද වර්ෂාවෙන් බාධා ඇතිවිය හැකිවිය බව කාළගුණ අනාවැකි පළකර තිබේ.
