ශ්‍රී ලංකා කණ්ඩායමේ වේග පන්දු යවන ක්‍රීඩක ඩිල්ෂාන් මධුෂංකටද මෙවර ආසියානු කුසලාන ක්‍රිකට් තරගාවලිය මග හැරිමට ඇති අවස්ථාව වැඩිබව ක්‍රිකට් ආරංචි මාර්ග තහවුරු කරයි. ඒ ඔහුගේ උදරයේ මාංශ පේශි ආබාධයක් හේතුවෙනි.
ඒ අනුව ශ්‍රී ලංකා කණ්ඩායමේ ප්‍රබලම තුරුම්පු කිහිපයක් මේ වනවිටත් තරගාවලියෙන් ඉවත් ඇති අතර ලංකා ප්‍රීමියර් ලීග් ක්‍රිකට් තරගාවලියේදී ආබාධයට ලක්වූ වනිදු හසරංග වෙනුවට තුන් ඉරියව් ක්‍රීඩක දුශාන් හේමන්ත සහ දුශ්මන්ත චමීර වෙනුවට අසිත ප්‍රනාන්දු කණ්ඩායමට කැදවීමට තීරණය කර තිබේ. ඩිල්ෂාන් මධුෂංකගේ ආබාධ තත්ත්වය හේතුවෙන් ශ්‍රී ලංකා සංචිතයට තවත් වේග පන්දු යවන්නන් දෙදෙනෙකු එක් කිරීමට වැඩි අවස්ථාවක් පවතින බව ආරංචි වේ. ඒ් අනුව නුවන් තුෂාර සමගින් බිනුර ප්‍රනාන්දු හෝ කසුන් රාජිත යන අයගෙන් එක් අයෙකුට අවස්ථාව පවති.
කුසල් ජනිත් පෙරේරාටද කොරෝන වෛරසය ආසාදනය වීම හේතුවෙන් මෙවර තරගාවලියේ මුල් තරග කිහිපය මග හැරෙනු ඇත.
ශ්‍රී ලංකා කණ්ඩායම සහභාගි වන පළමු තරගය මෙ මස 31 වැනිදා බංග්ලාදේශයට එරෙහිව පල්ලේකැලේ ජාත්‍යන්තර ක්‍රීඩාංගණයේදී පැවැත්වීමට නියමිතය.
